Djupnekartlegg i Nordsjøen i 2023

I år skal Mareano-programmet djupnekartleggje i Norskerenna i Nordsjøen. Fugro Germany Marine GmbH vann anbodskonkurransen. Dei legg ut på kartleggingstokt i sommar. I tillegg skal FFI djupnekartleggje for Mareano i Barentshavet.

Publisert: 14.03.2023 Oppdatert: 31.03.2023 Forfatter: Sissel Kanstad, Kartverket

Mareano sett søkelys på Nordsjøen i 2023, med sikte på å svare opp kunnskapsbehovet knytt til dei nye marine næringane – som havvind og havbruk til havs – og føreslåtte særleg verdifulle og sårbare område (SVO) i Nordsjøen.

Eit område i Norskerenna på til saman 2887 km² skal djupnekartleggas av Fugro Germany Marine GmbH i perioden juni–juli i år. Ein open anbodskonkurranse blei publisert i desember 2022. Kartverket hadde sett klima- og miljøkrav til konkurransen. Kontrakten har ein verdi på 17,5 millionar kroner.

I tillegg skal Kartverket sitt fartøy MS «Hydrograf» djupnekartleggje ei område på 2693 km² innafor terretorialgrensa i Norskerenna.

Kartutsnitt med delar av Noreg drapert av ein grå terrengmodell. Boksar i forskjellige fargar markerer område i Norskehavet kor Mareano-programmet planlegg eller har djupnekartlagt. — NORDSJØEN: Dei gule boksane merkar område i Nordsjøen som Mareano-programmet skal djupnekartleggje med multistråleekkolodd (MBES) i 2023. Kjelde: Kartverket/Mareano

Barentshavet

På Spitsbergenbanken og Hopendjupet skal Forsvarets forskingsinstitutt (FFI) djupnekartleggje område på til saman 3169 km², i regi av Mareano. FFI sitt forskingsfartøy MS «H.U. Sverdrup II» legg ut på tokt i Barentshavet i august–september 2023.