Banebrytande kartlegging med USV i Nordsjøen

– Dette er banebrytande arbeid, ikkje berre for Mareano: Det er truleg første gong at vi i Noreg kartlegg i dette omfanget med USV-teknologi, fortel sjefsingeniør Helge Welde i Kartverket, og legg til:

– I år markerer Mareano sitt 20 års-jubileum, men også at vi for første gong bruker ubemanna fartøy under djupneinnsamling.

Fugro vann den opne anbodskonkurransen, og deira nye USV Blue Eclipse® set kursen mot Nordsjøen i august. 

Velutstyrt, ny USV

Blue Eclipse® er 18 meter og den største USV-en i flåten til Fugro, utstyrt med avansert fleirstråle-ekkolodd og botnpenetrerande ekkolodd. USV-en skal samle inn omfattande datasett, inkludert djup, vasskolonnedata, botnreflektivitetsdata (backscatter) og profileringsdata under botn, for å forstå havbotn sin topografi og geologi.

– Å ta i bruk vår avanserte USV Blue Eclipse® i Mareano-programmet er eit viktig skritt, som demonstrerer korleis teknologi for ubemanna fartøy kan bli brukt i storskala kartleggingsprosjekt. Dette oppdraget lar oss levere dei høgoppløyselege og omfattande havbotndataa Mareano krev, samtidig som vi reduserer miljøpåverknaden av undersøkingane, seier Nick Simmons, direktør for Fugro sine USV-tenester.

Område i Nordsjøen som skal kartleggjast

Fugro sin USV Blue Eclipse® skal kartlegge til saman  675 km² i Nordsjøen for Mareano. Dei prioriterte måleområda er avgrensa til område frå 90 til 250 meters djup innafor tre utvalde blokkar utanfor territorialgrensa.

Om anbodsprosessen 

Anbodet blei publisert i januar 2025 med frist 24. februar 2025. Seks tilbydarar leverte anbod, kor Fugro Norway AS vann.

Kontrakten blei publisert med ein verdi på 6 000 000 NOK, med moglegheit for ein opsjon på inntil 10 000 000 NOK i tillegg. I kontrakten med Fugro er det løyst ut ein opsjon på 1 100 000 NOK for å utvide kartleggingsområdet mot Skagerrak.

Tilboda er evaluert etter følgande kriteria:

• pris (30 prosent)
• kvalitet og evne (50 prosent)
• kompetanseoverføring (20 prosent)

Nye miljøkrav til offentlege anskaffingar

Anbodsprosessen med USV som kartleggingsplattform vil hjelpe Mareano med å utvikle spesifikasjon og tildelingskriteria for klima- og miljøomsyn brukt i offentlege anskaffingar.

– Bruk av USV-er er éin metode å redusere klima- og miljøavtrykk når vi kartlegg havbotn. Årets anskaffing vil gi oss eit viktig læringsgrunnlag for framtidige anbodskonkurransar. Korleis den USV-baserte datainnsamlinga går, vil kunne påverke korleis Mareano innrettar anbod for kartlegging i framtida. Det er naturleg å anta at tradisjonelle målefartøy med mannskap vil vere relevante også framover, spesielt med tanke på at Mareano også har behov for å kartlegge utilgjengelege område, som djuphavet i Norskehavet, fortel Welde.