Dampskipet på havets botn

Dette funnet vart fyrste gong omtala i 2021, og er ei av mange kuriøse oppdagingar gjennom 20 år med kartlegging av havbotnen i Mareano-programmet. Jubileet no i 2025 gjer at vi trekk fram nokre enkeltsaker frå den omfattande kartlegginga.

Då Mareano-forskarane undersøkte botnen vest av Tennholmen fyr i Bodø 22. mai  2021, dukka eit 100 meter langt vrak opp på skjermen. 

Forskarane hadde allereie undersøkt dei detaljerte djupnekarta som dei brukar når dei planlegg kor havbotnen skal kartleggast med mellom anna video.  

Dei hadde observert korallar i området, men akkurat desse strukturane skilte seg litt ut frå korallane som alt var kartlagt. Dermed vart det bestemt at dette måtte dei undersøke nærare. 

Då kameraet nærma seg strukturane, vart det fort klart at det var snakk om eit gammalt vrak. Store korallar på vraket tyda på at det hadde lagt der lenge. 

Etter litt detektivarbeid om bord på forskingsfartøyet, blei det avslørt at det var DS Malmberget som endeleg var funne. 43 menneske omkom då den svenske skuta forsvann nesten sporlaust i ein storm for over 100 år sidan. Fleire av dei omkomne var frå Narvik og området rundt. 

• Les nyheitssaka som NRK publiserte om hendinga i 1913 og leitinga etter skipet:  Skipet som ble borte med 43 mann ombord 

Sjå video og høyr podcast

Video med glimt av vraket slik det ligg på havbotnen no og foto av korleis dampskipet såg ut før det sank:

Podcast:
Høyr om vrakfunnet i Havpodden: De avslører havdypets hemmeligheter