Forprosjektet er gjennomført av Kartverket i samarbeid med Noregs geologiske undersøking, Havforskingsinstituttet og Fiskeridirektoratet, på oppdrag frå Miljødirektoratet. Resultat og anbefalingar er oppsummert i rapporten «Data- og kunnskapsevaluering for økosystemkart til bruk i marint naturregnskap» – og er eit bidrag inn i det kommande pilotarbeidet med eit marint naturrekneskap for kystsona i Lofoten.
Det er ikkje tilstrekkeleg datadekning og tidsseriar som er nødvendig for analysar. Rapporten viser at det er behov for å utvide datagrunnlaget i areal, over tid og å lette tilgangen på data. I tillegg må det eksisterande datagrunnlaget tilretteleggjast betre.
Kunnskap frå Mareano er relevant
Datagrunnlag frå Mareano-programmet har vore sentrale i arbeidet til forprosjektet. Mareano-data følger FAIR-prinsippa. Dette gjer at desse dataa er lettare tilgjengeleg, å finne att og å gjenbruke. Mareano har data frå ytre deler av pilotområdet i Lofoten.
– Det blir interessant å sjå korleis data frå Mareano kommer til å bli brukt i utarbeiding av naturrekneskapet, og kva som blir resultatet både der Mareano har dekning og i område utan dekning, seier Hanne Hodnesdal, ansvarleg for Mareano i Kartverket.
Funn frå rapporten
Evalueringa av relevante datasett i forprosjektet viser at det er stor variasjon i dekninga for marine område. Grove data har generelt betre dekning enn data med høgare og meir detaljert oppløysing.
– Ujamn dekning av data kan skape kunnskapshol. Samtidig kan modellering av data bidra til å dekke hol. Mange område er kartlagt éin gong, og marine data blir i liten grad oppdatert. Dette gjer det vanskeleg å sjå på utviklinga over tid, seier Hodnesdal.
Rapporten påpeiker at fleire datasett er vanskeleg å finne da dei ikkje er tilgjengeleg i den nasjonale kartkatalogen Geonorge, men eksempelvis berre er tilgjengeleg på fagsider hos ulike etatar eller skildra i rapportar og utgreiingar.
Les meir om rapporten på kartverket.no.
